ژوورەكەیان سێ بە چوارە. لەبەر كتێب رێگەت نییە پێ هەڵێنیتەوە. لەسەر مێز و لێواری پەنجەرە و تەنانەت سەر تەختی خەوەكەش هەر كتێبی لێیە. خۆ كتێبخانەكەش جگە لەوكتێبانەی بەریز دانراون، لەسەر ئەوانیشەوە ئەوەندە كەڵەكە كراوە، پێم وایە ئەگەر بتهەوێ كتێبێك بدۆزیتەوە، دەبێ لەپێشدا بەلانی كەمەوە پەنجا كتێب بێنیتە خوارێ. گوڵاڵە قاپێك تۆوی گوڵەبەڕۆژە و دووچای لەسەر سینییەك داناوە و بە دەم زەردەخەنەیەكەوە كە دەڵێی بەزۆری هاتووەتە سەر لێوی بە ناسكەی دەستەخوشكی دەڵێ:

 ـ باسی ئەوەم بۆ دەكردی، وای لێ كردووم وەك دوژمن سەیری كتێب بكەم. توخوا ئەوەش بوو بە ژیان؟ رۆژ هەتا ئێوارێ سەری لە نێو كتێب و رۆژنامەدایە. هەر هیچ ئاگای لە ئێمە نییە. تا سەعات سێ و چواری شەو جاری وایە تا بەیانییش ئەوە هەر خەریكە. ئەو بەهارە هات و رابرد، سەوزایی دەشتمان نەدی. هەر گوتی: ئیشم هەیە. بۆخۆتان بچن. 

 ـ كچێ واز بێنە. جا چا نییە ئەوەی تۆ كتێب دەخوێنێتەوە. رێبازی من خواخوایەتی دوژمنی خۆی ببینێ و چاوی بەو كتێبانەی من نەكەوێ. هەر دەمبینێ كتێبێكم بەدەستەوەیە، چاوی دەچێتە پشتە سەری و دەڵێ خانمی ئەفلاتوون هیچ دەزانی ئەمڕۆ نیچە لە بازاڕی سەوزەفرۆشان كیلۆیەك تووری لە كارڵ ماركس دزی و، ئەرەستۆ فریای نەكەوتبایە شەق تڕێنیان دەكرد؟ ههههه 

 پیاو ئاوان، كتێب بخوێننەوە هەر كێشەن، نەخوێننەوە هەر كێشەن. خۆ رێباز كتێب ناخوێنێتەوە، ئەویش تا سەعات 12ی شەو لەگەڵ دۆست و برادەران لە كافتریا و گازینۆ دادەنیشێ و نێرگلە دەكێشێ و دۆمینە دەكا. كە دێتەوەش وەك لە دروێنە هاتبێتەوە، شەكەت و ماندوو خۆی بە عەرزیدا دەدا و ئاگای لە دنیا نامێنێ...

 خۆر وردە وردە ئاوا دەبوو. گوڵاڵە و ناسكە هەر وا خەریكی دەردەدڵ بوون. گوڵاڵە دەیگوت من قالەم بە كتێبەوە ناسی و لەبەر كتێبخوێندنەوە و دەستوقەڵەمەكەی خۆشم ویست و ئاشقی بووم. دەنا پێت وایە هێندە جوانە؟

ئێستا ئیتر پێی نەدەگوت قادر گیان. ناسكەش دەمێك بوو لێی نەبیستبۆوە. گوتی:

 ـ قالە كتێب دەخوێنێتەوە، بەڵام هەر قسەی زل زل لەو كتێبانە فێر دەبێ بۆ ئەوەی لە كۆڕ و كۆبوونەوان خۆیان پێوە هەڵكێشێ. نیوەڕۆیان كە دێتەوە ماڵێ غەزەبی لە نێوچاوانی دەبارێ. تا ئێستا چەند كۆڕ و سیمیناریان بۆ گرتووە تاقە جارێكیش چییە بە منی نەگوتووە وەرە بەشداربە. ئەوە سبەینێ لە یەكێتیی نووسەران وەك رۆماننووسێكی یەكسانیخواز و لایەنگری مافی ژنان كۆڕێكیان بۆ گرتووە. پێشی نەگوتووم بەڵام بۆخۆم دەچم. دەچم و دادەنیشم بزانم باسی چ دەكا. خوام لەو خوایە لەوێ خۆی هەڵكێشێ. 

 ناسكە پێكەنی و گوتی: خۆت هێندە سەغڵەت مەكە مە ماڵوێران. پیاوی ئێمە هەموو ئاوان. ئەوەتا مامۆستا ئارامی خۆمان كە لە كۆلێژیش پێكەوەین یەكێكە لە ناسراوترین مۆسیقارەكانی ئەم شارە، كەچی حەز ناكا كچەكەی فێرە مۆسیقا بێ. بۆ یەك كۆنسێرتیش ژن و منداڵەكەی خۆی ناهێنێ. دەڵێ: ئەدەیب و هونەرمەندی ئەم شارە ئی وەی نین ژن و منداڵت ببینن... مامۆستا سامانی شاعیر ئەو رۆژە لە كۆڕی شیعرەكەیدا پێش ئەوەی دەست بكا بە شیعر خوێندنەوە گلەیی ئەوەی كرد كە بۆچی كۆڕەكەی تەنیا چوار ئافرەتی تێدایە؟ لە پێشدا رووی لە یەكێتیی نووسەران كرد و گلەیی لێ كردن كە گۆیا ئافرەتیان بانگهێشت نەكردووە، ئینجا گلەیی لە ئافرەتی كورد كرد و گوتی: ئافرەتی كورد تا بازاڕی زێڕ و تەنوورە و عەزیە هەبێ، كوا روو دەكەنە كۆڕی رۆشنبیران...

گوڵاڵە تووڕە بوو و گوتی ئەی تۆ هیچت نەگوت؟ 

 ـ نا لەوێ هیچم نەگوت، بەڵام كە هاتمە دەرێ بەخۆیم گوت، گوتم مامۆستا سامان تۆ ژنەكەی خۆت ناهێنی لە كۆڕەكەتدا بەشدار بێ. شاعیر و نووسەرەكان یەك كەسیشیان ژن و كچەكانیان ناهێنن بەشداری كۆڕەكان بن، كەچی گلەیی لە كچ و ژنی خەڵكی دەكەن و تەوس و توانجیان تێ دەگرن كە بۆچی نایەنە كۆڕی ئەدیبان و رووناكبیران؟ كە وام گوت، مامۆستا سامان چاوێكی لێ كردم و گوتی: ئەوە باسێكی قووڵە... رۆژێك وەرە لە نادی بە وردی بۆتی روون دەكەمەوە...

 گوڵاڵە لەودەمەدا چاوی بڕیبووە مێزەكەی قادر كە لەبەر كتێب جێی نەمابوو قەڵەمێكیشی لەسەر دابنێ. ئاخێكی هەڵكێشا و گوتی:

 ـ ناسكە، من لە داخی ئەو نووسەر و رووناكبیرانە وازم لە كتێب و لە چیرۆكنووسین هێنا. ئەوەتا ئەوی لە هەموویان رووناكبیرتر و پێشەنگی هەموویان قادری منە. بێدەنگ بە ... باسەكە بگۆڕە هاتەوە...

 لەو دەمەدا دەرگا كراوە و قادر چوار پێنج كتێبی ئەستووری لەبن هەنگڵیدا وەژوور كەوت و یەكسەر بە زەردەخەنەوە بەرەو لای ناسكە هات و سڵاوی لێ كرد، هێشتا كتێبەكانی دانەنابوو گوتی:

 ـ بەخێر بێ ناسكە خاتوون. ماڵەكەمانت ئاوەدان كردەوە. ئەوە بۆچی چرای ماڵی ئێمەت دزیوە خاتوون؟ دەمێكە دیار نی. 

ناسكە گوتی: سپاس مامۆستا. وەڵاهی منیش سەرقاڵی ماڵ و ژیان و كتێبخوێندنەوەم.

 ـ باشە باشە. ئەو كتێبخوێندنەوەیەت لە هەموو شتێك باشترە... خۆزگە هەموو ژنانی میللەتەكەمان وەك تۆ بوایەن. بڕوات بێ ژنی ئێمە كتێبیان لێ بووەتە هەوێ. 

 ناسكە پێكەنی و گوتی: حەزم زۆر لەو بابەتەیە بۆ مناقشە بەڵام ئێستا درەنگە و دەبێ بڕۆم. رێباز دێتەوە و چێشتم بۆ لێ نەناوە. ئیدی هەرچی گوڵاڵە گوتی: راوەستە و مەڕۆ تەلەفۆنیان بۆ دەكەین با بێنە ئێرە، ناسكە قبووڵی نەكرد. 

پاش ماڵاواییكردنی ناسكە، قادر لەودیو كتێبەكانییەوە كە بە حاستەمێك سەرە رووتاوەكەی دیار بوو، گوتی:

ـ ئەوە بە ملی شكاوت هیچت لێ نەناوە؟ هەر دەزانی تۆو بترووكێنی و بەدەم تەلەفزیۆنەوە دانیشی. گامێش...

بەر لەوەی گوڵاڵە وەڵامی بداتەوە تەلەفۆنەكەی زەنگی لێ دا و قادر هەڵیگرت:

ـ ئەلۆ سڵاو قوربان. جەنابت مامۆستا قادری؟

ـ سڵاو لە جەنابیشت... بەڵێ فەرموو... 

 ـ مامۆستا گیان لە تەلەفزیۆنی ... ـەوە پێوەندیمان پێوە گرتووی. جەنابت وەك یەكسانیخواز و لایەنگرێكی بە ئەزموون و تێكۆشەری مافی ژنان ناسراوی، بۆیە گەورەمان دەكەی ئەگەر لە بەرنامەكەی سبەی شەوماندا بە بۆنەی 8ی مارسەوە بەشدار بی.

ـ بەسەر چاو... سەعات چەند دەبێ؟

 وەختەكەیان بۆ دیاری كرد و بە سپاسەوە ماڵاواییان لێ كرد. قادر بە پەلە فەیسبووكەكەی كردەوە و پەیامێكی خەست و خۆڵی بە بۆنەی 8 مارس بڵاو كردەوە و چەپكە گوڵێكیشی لەگەڵ دانا. بە نامەی تایبەتیش پیررۆزبایی لە پەنجا شێست ئافرەتی برادەری كرد و هیوای بەختەوەریی بۆ خواستن و گوتی: شانازیتان پێوە دەكەم و بەختەوەرم نیشتمانەكەم ئافرەتی وەك ئێوەی هەیە. ئینجا لە جێی خۆی هەستا، یەك بە ژوورەكە نەڕاندی:

 ئەوە لە كوێی گامێش؟ یانی تۆ ئەقڵت نییە و نافامی پەرداخێكم ئاو بدەیتێ؟